រដ្ឋមន្ត្រីក្រសួងការពារជាតិស្ដីទីថៃ បញ្ជាឱ្យជម្លៀសអ្នកតវ៉ាថៃចេញពីតំបន់ណងចាន់ ដោយអះអាងថាបារម្ភខ្លាចមានការប៉ះទង្គិចគ្នានាពេលខាងមុខ

រដ្ឋមន្ត្រីក្រសួងការពារជាតិស្ដីទីថៃ បញ្ជាឱ្យជម្លៀសអ្នកតវ៉ាថៃចេញពីតំបន់ណងចាន់ ដោយអះអាងថាបារម្ភខ្លាចមានការប៉ះទង្គិចគ្នានាពេលខាងមុខ

នាយឧត្តមសេនីយ៍ Natthaphon Narkphanit រដ្ឋមន្ត្រីក្រសួងការពារជាតិស្ដីទីថៃ បានបញ្ជាឲ្យកងទ័ពភូមិភាគទី១ថៃ រៀបចំឱ្យអ្នកតវ៉ាថៃ នៅតំបន់ណងចាន់ (ជាប់ភូមិជោគជ័យ ឃុំអូរបីជាន់) ចាកចេញពីតំបន់នោះ ដើម្បីសុវត្ថិភាពរបស់ខ្លួន។

ថ្លែងកាលពីថ្ងៃព្រហស្បតិ៍ ទី២៨ ខែសីហា, រដ្ឋមន្ត្រីការពារជាតិស្ដីទីថៃរូបនេះ បានបង្ហាញក្ដីបារម្ភចំពោះភាពតានតឹង ដែលកើនឡើងរវាងប្រទេសថៃ និងកម្ពុជា ជាពិសេសចំពោះការធ្វើដំណើររបស់អ្នកតវ៉ាពីភាគីទាំងពីរចូលទៅក្នុងតំបន់នោះ។ លោកបានថ្លែងថា កងទ័ពភូមិភាគទី១ ត្រូវបានបញ្ជាឲ្យធ្វើការជាមួយសាធារណជនថៃ ដើម្បីជំរុញការយល់ដឹង ដោយសារអាជ្ញាធរ មានក្ដីបារម្ភពីសុវត្ថិភាព និងសុខុមាលភាពរបស់អ្នកដែលពាក់ព័ន្ធ នៅក្នុងតំបន់នោះ។

លោក Natthaphon ក៏បានណែនាំឱ្យភាគីថៃពិភាក្សាបញ្ហានេះ តាមរយៈគណៈកម្មាធិការព្រំដែនទូទៅថៃ-កម្ពុជា(GBC) ដោយអះអាងថាយន្តការនេះ អាចជួយដោះស្រាយស្ថានការណ៍បាន។

លោក Natthaphon បានសង្កត់ធ្ងន់ថា វាជារឿងសំខាន់ណាស់សម្រាប់ប្រជាជនថៃ ក្នុងការចាកចេញពីតំបន់នោះ ដើម្បីចៀសវាងការប៉ះទង្គិចគ្នាដែលអាចកើតមាន និងពិបាកគ្រប់គ្រង។ ទោះជាយ៉ាងណាក៏ដោយ លោកមានសុទិដ្ឋិនិយមថា ស្ថានការណ៍នេះ នឹងមិនប៉ះពាល់ដល់ការចរចា ដែលកំពុងដំណើរការទេ ទោះបីជាលោកបានទទួលស្គាល់ថា ការកើនឡើងនូវភាពតានតឹងអាចនឹងមានផលប៉ះពាល់ខ្លះក៏ដោយ។

នៅពេលមានសំនួរពាក់ព័ន្ធនឹង ការបង្ហោះរបស់សកម្មជនថៃឈ្មោះ Gun Jompalang ដែលបានយកឡានដឹកលាមកទៅកាន់តំបន់នោះ លោក Natthaphon បានលើកឡើងថា វាអាស្រ័យលើប្រព័ន្ធផ្សព្វផ្សាយក្នុងការបកស្រាយស្ថានការណ៍នេះ ប៉ុន្តែលោកបានបង្ហាញពីក្ដីបារម្ភកាន់តែខ្លាំង ចំពោះសុវត្ថិភាពសាធារណៈ ជាងសកម្មភាពរបស់បុគ្គលណាម្នាក់។

រដ្ឋមន្ត្រីក្រសួងការពារជាតិស្ដីទីថៃរូបនេះ ក៏ឆ្លៀតចោទប្រកាន់ភាគីកម្ពុជាថា អជ្ញាធរកម្ពុជាមានការលំបាកក្នុងការគ្រប់គ្រងអ្នកតវ៉ារបស់ខ្លួន ដែលអាចបណ្ដាលឱ្យមានឧប្បត្តិហេតុនាពេលណាមួយ។ លោកបានអំពាវនាវឱ្យសាធារណជនសហការគ្នា ដើម្បីរក្សាសន្តិភាព។

ក្រៅពីនេះ លោកក៏បានទទួលស្គាល់ដែរថា ភាពតានតឹងតាមព្រំដែន ដែលកំពុងបន្ត អាចមានផលវិបាកផ្នែកសេដ្ឋកិច្ចក្នុងរយៈពេលវែង ប៉ុន្តែលោកអះអាងថា រដ្ឋាភិបាលថៃកំពុងខិតខំប្រឹងប្រែង ដើម្បីរក្សាតុល្យភាពគ្រប់ទិដ្ឋភាពនៃស្ថានការណ៍នេះ៕

ផ្សាយថ្ងៃទី២៨ ខែសីហា ឆ្នាំ២០២៥
ប្រភព៖ The Nation