ឯកឧត្តមទេសរដ្ឋមន្ត្រី គន់ គីម ថ្លែងក្នុងពិធីសម្ភោធ ទីស្នាក់កាសមាគមអតីយុទ្ធ ខេត្តបន្ទាយមានជ័យ ថា អតីតយុទ្ធជន និងនិវត្តជន សុទ្ធតែជាអ្នកជួយជាតិ និងស្ថាបនាជាតិរហូតមកទល់បច្ចុប្បន្ន..

បន្ទាយមានជ័យ÷នៅព្រឹកថ្ងៃអាទិត្យ ១០រោច ខែអាសាឍ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី២០ ខែកក្កដា ឆ្នាំ២០២៥ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជា បានអញ្ជើញក្នុងពិធីសម្ពោធទីស្នាក់ការសមាគមអតីតយុទ្ធជនខេត្តបន្ទាយមានជ័យ ជាអំណោយដ៏ថ្លៃថ្លារបស់សម្តេចតេជោ ហ៊ុន សែន ប្រធានសមាគមអតីតយុទ្ធជនកម្ពុជា នៅខេត្តបន្ទាយមានជ័យ ។

ពិធីនេះមានការចូលរួមពី ថ្នាក់ដឹកនាំ ស.អ.ក, លោក ឃ្លោក ណូយ អភិបាលរងខេត្ត តំណាង ឯកឧត្តម អភិបាលខេត្ត និងជាប្រធានកិត្តិយស ស.អ.ក ខេត្ត, លោកឧត្តមសេនីយ៍ទោ សិទ្ធ ឡោះ ស្នងការនគរបាលខេត្ត និងជាប្រធាន ស.អ.ក ខេត្ត, តំណាងមេបញ្ជាការកងរាជអាវុធហត្ថខេត្ត, តំណាងមេបញ្ជាតំបន់ប្រតិបត្តិការសឹករងខេត្ត, លោកប្រធានមន្ទីរ-អង្គភាពជុំវិញខេត្ត ព្រមទាំងអតីតយុទ្ធជន និងនិវត្តជន សរុបចំនួន ៣០០នាក់។

នាឱកាសនោះ​ ឯកឧត្តមកិត្តិសង្គហបណ្ឌិត គន់ គីម បានសម្តែងការដឹងគុណចំពោះគុណបំណាច់របស់អតីតយុទ្ធជន ដែលបានតស៊ូគ្រប់ដំណាក់កាលដែលប្រទេសកម្ពុជាធ្លាប់ឆ្លងកាត់នូវសង្គ្រាម បូករួមទាំងសង្គ្រាមផ្ទៃក្នុង រហូតមកបញ្ចប់សង្គ្រាមដោយជោគជ័យក្រោមនយោបាយ ឈ្នះ ឈ្នះ របស់សម្តេចតេជោ ហ៊ុន សែន បិតាស្ថាបនិកសន្តិភាព ទើបអាចដឹកនាំយុទ្ធជន យុទ្ធនារី ជួយឱ្យប្រទេសកម្ពុជាមានសុខសន្តិភាពពេញលេញ។

ក្នុងពិធីសំណេះសំណាលនោះ ឯកឧត្តមកិត្តិសង្គហបណ្ឌិត គន់ គីម​ បានរម្លឹកពីវីរភាពអង់អាចក្លាហានរបស់អតីតយុទ្ធជនគ្រប់ជំនាន់ ក្នុងការរួមចំណែកធានាជួយឱ្យប្រទេសកម្ពុជាមានសុខសន្តិភាព ស្ថិរភាព​ និងការអភិវឌ្ឍជាតិមកដល់សព្វថ្ងៃ គឺមានការរួមចំណែកពីអតីតយុទ្ធជន និងនិវត្តជន​ ទើបមានប្រទេសកម្ពុជាដ៏រុងរឿង។

ក្នុងនាម​ អគ្គលេខាធិការសមាគមអតីតយុទ្ធជនកម្ពុជា​ ឯកឧត្តមកិត្តិសង្គហបណ្ឌិត គន់ គីម​ មានប្រសាសន៍ថា​ ដោយមេីលឃេីញពីការរួមចំណែក​ មិនថាទាំងអតីតយុទ្ធជន​ និងនិវត្តជន​ ទេីបសម្តេចតេជោ​ ហ៊ុន​ សែន​ ប្រធានសមាគម​ សម្រេចបញ្ជូលអតីតយុទ្ធជន​ និងនិវត្តជន​ ឱ្យមកក្រោមឆ័ត្រតែមួយ​ និងដឹកនាំដោយផ្ទាល់ពីសម្តេចតេជោ​ ប្រធានសមាគម។

ជាមួយគ្នានេះ​ ឯកឧត្តមកិត្តិសង្គហបណ្ឌិត គន់ គីម​ មានប្រសាសន៍ទៀតថា​ រាជរដ្ឋភិបាល​ នីតិកាលទី៧​ នៃរដ្ឋសភា​ ដឹកនាំដោយសម្តេចមហាបវរធិបតី​ ហ៊ុន​ ម៉ាណែត​ នាយករដ្ឋមន្រ្តី​ និងជាអនុប្រធានទី១​ សមាគមអតីតយុទ្ធជនកម្ពុជា​ បានបន្តយកចិត្តទុកដាក់ជាប់ជានិច្ច​ទាំងការផ្តល់អត្ថប្រយោជន៍ផ្សេងៗ​ ក៏ដូចដោះស្រាយជីវភាពរស់នៅដល់អតីតយុទ្ធជនណាដែលជួបការលំបាក​ ដេីម្បីផ្តល់ផ្ទះ​ និងដីសម្បទានសង្គមកិច្ចសម្រាប់ជួយដល់ជីវភាពរស់នៅប្រចាំថ្ងៃឱ្យកាន់តែប្រសេីរ។

ចុងបញ្ចប់ ឯកឧត្តមកិត្តិសង្គហបណ្ឌិត គន់ គីម បាននាំយកការផ្តាំផ្ញើសាកសួរសុខទុក្ខពីសម្តេចអគ្គមហាសេនាបតីតេជោ ហ៊ុន សែន, សម្តេចកិត្តិព្រឹទ្ធបណ្ឌិត ប៊ុន រ៉ានី, សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងលោកជំទាវ ពេជ ចន្ទមុន្នី និងអំណោយជូនអតីតយុទ្ធជន និងនិវត្តជនទាំងអស់ សូមរក្សាសុខភាពឱ្យបានល្អ ដើម្បីបន្តទទួលបានការយកចិត្តទុកដាក់ និងអត្ថប្រយោជន៍បន្ថែមទៀតពីរាជរដ្ឋាភិបាល ។

អំណោយប្រគល់ជូន អតីតយុជន ចំនួន ១៥០ នាក់ ម្នាក់ៗទទួលបាន អង្ករចំនួន ២៥គីឡូក្រាម ថវិកាចំនួន ៥មុឺនរៀល ទឹកត្រីចំនួន ១យួរ ទឹកសុីអុីវចំនួន ១យួរ ទឹកសុទ្ធចំនួន១ យួរ មុីចំនួន ១កេស និង សារ៉ុង ចំនួន១ ៕