អាជ្ញាធរជាតិដោះស្រាយវិវាទក្រៅប្រព័ន្ធតុលាការ បានរៀបចំកិច្ចប្រជុំដើម្បីពិនិត្យ និងពង្រឹងការអនុវត្តការងារក្នុងក្របខ័ណ្ឌនៃការចុះអនុស្សរណៈនៃការយោគយល់គ្នា (MOU) រវាង អ.ដ.ក. និងរដ្ឋបាលខេត្តកណ្ដាល

ខេត្តកណ្ដាល៖ នាព្រឹកថ្ងៃពុធ ៩កើត ខែអស្សុជ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី១ ខែតុលា ឆ្នាំ២០២៥ ដោយបានទទួលការអនុញ្ញាតដ៏ខ្ពង់ខ្ពស់ពី ឯកឧត្តម កេីត​ រិទ្ធ​ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជាប្រធាន អ.ដ.ក.,​ លោកជំទាវ ជា វាសនា រដ្ឋលេខាធិការក្រសួងយុត្តិធម៌ និងជាសមាជិក អ.ដ.ក. និង ឯកឧត្តម នុត ពុធដារ៉ា អភិបាលរងនៃគណៈអភិបាលខេត្តកណ្ដាល​ បានអញ្ជើញជាអធិបតីក្នុងកិច្ចប្រជុំ​ ដើម្បីពិនិត្យ និងពង្រឹងការអនុវត្តតាមស្មារតីនៃ​អនុស្សរណៈនៃការយោគយល់គ្នា (MOU) រវាង អ.ដ.ក. និងរដ្ឋបាលខេត្តកណ្ដាល ដែលកិច្ចប្រជុំនេះ​ ក៏មានការអញ្ជើញចូលរួមពី​ ថ្នាក់ដឹកនាំ​ និងមន្ត្រីពាក់ព័ន្ធនៃអគ្គលេខាធិការដ្ឋាននៃ អ.ដ.ក.​ ព្រមទាំងមន្ត្រីរាជការនៃមន្ទីរ-អង្គភាពនានាជុំវិញខេត្តកណ្ដាល មានចំនួនសរុប​ ៦០ រូប។

កិច្ចប្រជុំនេះ ត្រូវបានរៀបចំឡេីងក្នុងគោលបំណងសំខាន់ៗ​ ចំនួន ៣​ គឺ ៖

(១)-ពិនិត្យ​ និងពិភាក្សាអំពី​វិធីសាស្ត្រសមស្របដើម្បីពង្រឹង និងលើកកម្ពស់កិច្ចសហការ​ រវាង អ.ដ.ក. និងរដ្ឋបាលខេត្តកណ្ដាល លើការងារសម្រុះសម្រួលផ្សះផ្សាវិវាទ​ ជូនប្រជាពលរដ្ឋក្នុងមូលដ្ឋានខេត្តកណ្ដាល​។

(២)-ស្វែងយល់អំពីតម្រូវការជាក់ស្តែងក្នុងការរៀបចំឲ្យមានវគ្គបណ្ដុះបណ្ដាល ដេីម្បីពង្រឹងសមត្ថភាពលេីជំនាញសម្រុះសម្រួលដោះស្រាយវិវាទ ជូនដល់មន្ត្រីពាក់ព័ន្ធនៃមន្ទីរ-អង្គភាពនានាជុំវិញរដ្ឋបាលខេត្តកណ្តាល។ និង

(៣)-សិក្សាអំពីវិធីសាស្រ្តក្នុងការបញ្រ្ជាបការយល់ដឹងពាក់ព័ន្ធនឹងយន្តការនៃការដោះស្រាយវិវាទក្នុងក្របខ័ណ្ឌនៃ​ អ.ដ.ក.​ ឱ្យបានកាន់តែទូលំទូលាយ​ ជូនដល់អាជ្ញាធរមូលដ្ឋាន​ ជាពិសេសប្រជាពលរដ្ឋនៅក្នុងមូលដ្ឋានខេត្តកណ្ដាល។

សូមរំលឹកផងដែរថា អ.ដ.ក. និងរដ្ឋបាលខេត្តកណ្តាល បានចុះអនុស្សរណៈនៃការយោគយល់គ្នា (MOU) ស្តីពីកិច្ចសហប្រតិបត្តិការក្នុងការសម្រុះសម្រួលផ្សះផ្សាវិវាទ កាលពីថ្ងៃទី២២ ខែវិច្ឆិកា ឆ្នាំ២០២៤ កន្លងទៅនេះ។